"Neftçi"nin amerikalı basketbolçusu: "Azərbaycanı sevirəm, Bakı mənə pozitiv enerji verir" - MÜSAHİBƏ

Azərbaycan Basketbol Liqasının yarımfinalına yüksələn "Neftçi" komandasının amerikalı oyunçusu Pet Beykon AZƏRTAC-a müsahibəsi

- Azərbaycan Basketbol Liqasının pley-off mərhələsində "Ordu" komandasına hər iki oyunda qalib gələrək yarımfinala yüksəldiniz. Bu barədə nə deyə bilərsiniz?

- Çox yaxşı oynadığımızı düşünürəm. İkinci oyunda "Ordu"nun cəmi 54 xal toplamasını bizim üçün yaxşı nəticə hesab etmək olar. Çünki rəqib doğrudan da yaxşı top saxlayan komandadır. Fikrimcə, müdafiədə belə oynasaq, işimiz daha da çətinləşəcək. Əsas hədəfimiz mümkün qədər bir arada ola bilmək və bunu axıra kimi davam etdirməkdir.

- Necə düşünürsünüz, finala çıxıb, ölkə çempionu ola bilərsiniz?

- Bəli, bunu reallaşdıra bilərik. Çünki yaxşı oyunçularımız və məşqçilər heyətimiz var. Öz performansımızı göstərə bilsək, Azərbaycan çempionu ola bilərik.

- Legioner oyunçu kimi, Azərbaycan Basketbol Liqasının səviyyəsini necə qiymətləndirirsiniz?

- Bu liqa rəqabətədavamlıdır. Çempionatda mübarizə aparan bütün komandaların hər oyunda qalib gəlmək şansı olur. Əvvəlcədən kiminsə qələbə qazanacağını demək çətindir.

- Azərbaycan haqqında təəssüratlarınız necədir?

- Mən bu ölkəni sevirəm. Burada çox gözəl insanlarla tanış oldum. Bakı şəhəri heyrətamizdir. Düzünü desəm, buraya gəlməmişdən əvvəl Afrikada oynayırdım və pis formada idim. Karyeramda yeni səhifə açmaq istəyirdim, Neftçi" ilə müqavilə bağladıqdan sonra hər şey əla oldu.

- Ölkəmizi bəyəndiyinizi söylədiniz. Bəs, burada ən sevdiyiniz yerlər hansılardır?

- Şəhərin mərkəzinə getməyi xoşlayıram. Burada əla yeməklər verilən restoranlar var. Ən əsası da şəhərin möhtəşəm mənzərəsi insanı valeh edir. Oraya getdiyim zaman əhval-ruhiyyəm daha da yüksəlir. Bu şəhər mənə müsbət enerji ötürür.

- Azərbaycanda başınıza gələn maraqlı hadisə olubmu?

- Bir dəfə şəhərin mərkəzində olarkən tanımadığım bir şəxsin meymununu gəzdirmişdim. Bu hadisə mənə gülməli və maraqlı gəlmişdi.

- Basketboldan başqa, hansı idman növlərinə həvəsiniz var?

- Futbol və voleybolu çox sevirəm. Hətta mövsüm başa çatmamış futbol üzrə Azərbaycan çempionatının bir oyununu izləmək istərdim.

- Azərbaycanda daha çox qalmağı düşünürsünüz?

- Bu, müqaviləmdən asılı olan bir şeydir. Əlbəttə, "Neftçi" mənə yeni müqavilə təklif etsə, sevə-sevə qalaram.

İdman.biz