Idman.biz
NBA-da boyu 190 sm-dən az olan basketbolçular son 5 il ərzində topa daha az sahib olurlar və meydanda keçirdikləri dəqiqələrin sayı getdikcə azalır.
İdman.biz xəbər verir ki, statistikaya əsasən, getdikcə liqda oyunçuların orta boyu artır.
2019/20 mövsümündə ümumi oynanmış dəqiqələrin 22%-i boyu 190 sm və daha az olan oyunçulara məxsus idi. Lakin ötən mövsümdə bu göstərici 16%-ə düşüb. Beş il əvvəl topun 38% hallarda bu boy kateqoriyasındakı oyunçuların əlində olduğu bildirilir. 2024/25 mövsümündə bu rəqəm cəmi 27% olub.
Bildirilir ki, bu kateqoriyaya aid olan basketbolçuların oyun vaxtı çoxdan azalmaqdadır: 2008/09 – 2018/19 mövsümləri arasında bu göstərici 23%-dən 18%-ə enib. 2019/20 mövsümündə isə liqanın oyunçuların boyunu ayaqqabısız ölçmə tələbi səbəbindən bu rəqəm 22%-ə qədər artmışdı (bu səbəbdən NBA-da orta boy təxminən 2 sm azalmışdı). Lakin o vaxtdan bəri yenidən azalma müşahidə olunur.
Keçən mövsüm müntəzəm çempionatda boyu 183 sm və daha az olan yeganə oyunçu "Memfis" klubunun debütantı Yuki Kavamura olub (173 sm və 83 dəqiqə oynayıb).
İdman.biz
