İdman.biz
"Sabah" komandasının ABŞ-dan olan basketbolçusu Trevon Duval AZƏRTAC-ın suallarını cavablandırıb. İdman.biz müsahibəni təqdim edir.
- Artıq 3 aya yaxındır Azərbaycandasınız. Həm ölkəmiz, həm də çıxış etdiyiniz "Sabah" klubu ilə bağlı təəssüratlarınızı bilmək maraqlı olardı…
- Azərbaycandakı həyatımdan və karyeramdan tam olaraq zövq alıram. Bura gözəl ölkədir. Klubuma gəlincə, hər kəs mənə isti münasibət göstərir. Burada hər şey peşəkar səviyyədə qurulub.
- "Miluoki" komandasının heyətində NBA-da 7 oyunda meydana çıxmısınız. Həmin dövrü necə xatırlayırsınız? Ümumiyyətlə, böyük liqada oynamaq necə hissdir?
- NBA-da oynadığım üçün xoşbəxtəm və bu, həyatımın heç vaxt unuda bilməyəcəyim anıdır. Həmin liqa mənim üçün əla təcrübə oldu. "Miluoki"nin heyətində çox şey öyrəndim.
- Hətta ABŞ millisinin aşağı yaş qrupları üzrə milli komandalarına da dəvət almısınız...
- Bəli, dəfələrlə ABŞ-ın aşağı yaş qrupları üzrə komandalarının təlim-məşq toplanışında iştirak etmişəm. Bu, mənim üçün şərəf idi.
- Niyə NBA-da möhkəmlənə bilmədiniz?
- NBA-da oynamaq fürsətlərdən, şərtlərdən və bir az da şansdan asılıdır. Bunlardan bəziləri məndə alınmadı.
- Maraqlıdır, hazırda dostluq etdiyiniz məşhur basketbolçular varmı?
- Hazırda NBA-da çıxış edən bir neçə basketbolçu dostum var.
- "Sabah" komandasının bu mövsüm FIBA Avropa Kubokundakı çıxışını necə qiymətləndirirsiniz?
- Həqiqətən yaxşı matçlar keçirdik və orada oynamağa layiq olduğumuzu göstərdik. Sadəcə, bir neçə əsas oyunçunun olmaması səbəbindən istədiyimiz nəticələri əldə edə bilmədik.
- Rimas Kurtinaytis kimi baş məşqçinin rəhbərliyi altında oynamaq necə hissdir?
- Kurtinaytis əfsanəvi məşqçidir. Onun rəhbərliyi altında oynadığıma görə qürur duyuram. Düşünürəm ki, litvalı mütəxəssisdən çox şey öyrənəcəyəm.
- Bu mövsüm yerli çempionatda hədəfləriniz nədir?
- "Sabah" Azərbaycan Basketbol Liqasında üçüncü mövsümünü keçirir. Artıq komandanın iki çempionluğu var. Əlbəttə ki, builki hədəf də Azərbaycan çempionu olmaqdır.
- Sizcə, liqada hansı komanda "Sabah"la başabaş mübarizə aparmaq gücündədir?
- Düzünü desəm, heç bir komandanın "Sabah"la rəqabət apara biləcəyini düşünmürəm. Çünki biz çox güclüyük.
- Bakıda hansı tarixi yerləri bəyənirsiniz?
- Qız Qalası bu ölkənin tarixini ziyarət etmək və araşdırmaq üçün həqiqətən gözəl yerdir. Bu abidənin memarlığını çox sevirəm.
İdman.biz
