Murat Dikmen: “Komandam 18 xal geriyə düşdükdə belə məndə rahatlıq var idi”

"Gecə və gündüz kimi bir matç oynadıq. Hər iki hissədə də bir-birindən fərqli ssenarilər baş tutdu".

İdman.biz xəbər verir ki, bunu "Xəzri" basketbol klubunun baş məşqçisi Murat Dikmen deyib.

Türkiyəli mütəxəssis Azərbaycan çempionatında finala yüksəlməsini dəyərləndirib. O, NTD İNDİQO-nu mübarizədən kənarlaşdırmasında təcrübənin rol oynadığını bildirib: "Böyük fasilədən komandama pley-offlarda müdafiənin nə qədər önəmli olduğunu bir daha xatırlatdım. Rəqibin bizə qarşı hazırladığı xüsusi hücumlara qarşı müdafiəmizlə cavab verdik və üçüncü periodda oyunda tarazlıq yaratdıq. 18-5 hesablı seriyamız da bunu göstərir. Son periodda da təşəbbüsü ələ aldıq. Əlavə edilmiş hissədə də pley-offlardakı təcrübəmizdən də istifadə edərək qalib gəlməyi bacardıq. Mən bundan öncə öz ölkəmdə bu cür qarşılaşmalarda çox iştirak etmişəm".

Dikmənin sözlərinə görə, bu cür seriyalarda necə hazırlaşmağı, necə mübarizə aparmağı və matçın içindəki davamlılığı çox yaxşı bildiyi üçün çox rahat olub: "Hətta komandam 18 xal geriyə düşdükdə belə məndə rahatlıq var idi. Buna görə oyunçularımı təbrik edirəm. Həqiqətən də final onların haqq idi. İlk mövsümümüzdə iki finalda da mübarizə aparmaü bizim üçün çox çətin idi. Birində məğlub olduq. Ümid edirəm ki, "Sabah"la oynayacağımız final matçlarında ilk olaraq yaxşı basketbol sərgiləyərik. Daha sonra da arzu etdiyimiz seriya ilə hədəfimizə çatarıq. İndidən pley-offda çıxış edəcək bütün oyunçulara, məşqçilərə uğurlar arzu edirəm".

Qeyd edək ki, "Xəzri" yarımfinalın ikinci görüşündə 86:81 hesabı ilə qələbə qazanıb.

İdman.biz