İdman.biz
Basketbolun 3x3 növü üzrə Qadın seriyasının Bordo mərhələsində Azərbaycan millisinə texniki məğlubiyyət verilməsinin səbəbi bəlli olub.
Azərbaycan Basketbol Federasiyasının baş katibi Vüqar Əzimovun İdman.bizə verdiyi məlumata görə, buna oyunçuların zədələrinin yenidən özünü göstərməsi səbəb olub.
Qurum rəsmisinin sözlərinə görə, İspaniya ilə oyun öncəsi komandada meydana çıxa biləcək cəmi 2 basketbolçu qalıb: "Aleksandra Mallenhauer son gündə zədələndi. Onun oynayacağını düşünsək də, görüş öncəsi zədəsi şiddətləndi. Dina Ulyanovanın da analoji problemdən əziyyət çəkir. Təyyarədə olarkən o yenidən ağrılar hiss edib və oynaya bilməyib. Qaydalara əsasən 2 nəfərlə görüşlərə çıxmaq olmaz və bu səbəbdən də millimizə texniki məğlubiyyət verilib".
Əzimov komandanın zədəli basketbolçularının son durumunu da açıqlayıb: "Həkimlərin dediyinə görə onlar 7-10 günə tamamilə sağalacaqlar. Xüsusilə Dinanın zədəsi artıq sağalmaq üzrədir. Amma Olimpiadaya görə onları riskə atmaq olmaz. Ümid edirəm ki, Paris-2024-ə qədər yeni zədələr yaşanmaz. Amma Olimpiya Oyunlarına qədər problem qalmayacaq".
Qeyd edək ki, Bordo mərhələsində 1 oyuna çıxan millimiz şəhərin eyniadlı komandasına 9:17 hesabı ilə uduzub.
Emin Ağa
İdman.biz
