Sport24.az
16 yaşadək basketbolçu qızlardan ibarət Azərbaycan millisi Avropa çempionatının C divizionunda növbəti oyununu keçirib.
Sport24.az xəbər verir ki, yığmamız Cəbəllütariqdə təşkil olunan yarışın qrup mərhələsinin III turunda Kiprlə qarşılaşıb.
Türkiyəli mütəxəssis Evren Alkayanın yetirmələri A qrupunun liderlərinin görüşündə də qalib gəlib. Bunadək Ermənistan və Gürcüstanı darmadağın edən Azərbaycan yığması ada təmsilçisinə də heç bir şans verməyib.
Millimiz ardıcıl 3-cü qələbə ilə qrupda 1-ci yeri tutub. Ötən il çempion tituluna yiyələnən komandamız C divizionunda keçirdiyi ümumilikdə 8-ci matçında da qalib gəlib.
Qeyd edək ki, yarımfinal mərhələsinin matçları iyulun 13-də baş tutacaq.
U-16-lar (qızlar) arasında Avropa çempionatı
C divizionu, A qrupu
III tur, 11 iyul
12:30. Azərbaycan – Kipr - 68:45 (19:8, 21:14, 18:13, 10:10)
Cəbəllütariq. "Tersentenari" İdman Zalı
