Report.az
"Sabah" klubunun basketbolçusu Kamran Məmmədov "Report"un suallarını cavablandırıb. 25 yaşlı oyunçu paytaxt təmsilçisinin qarşıdakı hədəflərindən söz açıb.
- Komandanın Litvadakı təlim-məşq toplanışı başa çatıb. Hazırlıq prosesi necə keçib?
- Təlim-məşq toplanışı əla alındı. Düşünürəm ki, klub olaraq yeni mövsümə tam hazırıq.
- Toplanış zamanı Litvanın bir neçə kollektivlə üz-üzə gəldiniz. Keçirdiyiniz yoxlama oyunları ilə bağlı nə deyə bilərsiniz?
- Yoxlama matçlarının yaxşı keçdiyini deyə bilərəm. İlk və son qarşılaşmaları müqayisə etsək, nə qədər böyük həcmdə iş ortaya qoyduğumuzu görmək olar.
- "Sabah" siz də daxil olmaqla mövsümöncəsi bir neçə transfer gerçəkləşdirib. Yeni oyunçular kollektivə tam uyğunlaşıb?
- Özüm də klubda yeniyəm. Uyğunlaşma prosesi sürətli keçdi. Komanda daxilində çox yaxşı dostluq ab-havası var.
- "Sabah" Azərbaycan Basketbol Liqasında yenə favoritdir. Növbəti çempionluğa inanırsınız?
- Əvvəlcədən nəsə demək düzgün olmaz. İlk növbədə öz oyunumuzla statusumuzu göstərməliyik. Sonra qızıl medala layiq olduğumuzu sübut etməliyik.
- "Sabah" Çempionlar Liqasının müntəzəm mövsümündə çıxış edəcək. Burada hədəf nə olacaq?
- Təbii ki, növbəti mərhələyə yüksəlmək əla olardı. Müntəzəm mövsümdə debüt ilində hər oyunda keyfiyyətli və yaxşı basketbol sərgiləmək niyyətindəyik. Bunu bacarsaq, nəticə də özünü çox gözlətməyəcək. Bir sözlə, hər görüşdə maksimum güc sərf edib, əlimizdən gələnin ən yaxşısını etməyə çalışacağıq.
Kamran Məmmədov "sabah" basketbol klubu Çempionlar Liqası basketbol
