İdman.biz
"Hesab fərqi böyük olsa da, bu, müsbət haldır".
Bunu İdman.bizə Azərbaycan Basketbol Federasiyasının baş katibi Vüqar Əzimov deyib.
O, qadın basketbolçulardan ibarət yığmamızın AVRO-2025-in seçmə mərhələsində Litvaya 47:108 hesabı ilə məğlubiyyətini şərh edib. Əzimov bildirib ki, böyük hesabla uduzmağa baxmayaraq, bu yarışlara qatılmaq onlar üçün vacibdir: "Hazırda komandanın yarısı 16-17 yaşlı qızlardan ibarətdir. Bunların təcrübə qazanması baxımdan belə yarışlara qatılmağa məcburuq. Əgər belə qarşılaşmalara çıxmasalar, inkişaf edə bilməzlər. Bizim əsas hədəfimiz belə yarışlara qatılıb, qızlarımızın ustalıq səviyyəsinin artırılmasıdır. Hazırda hesab bizim üçün əsas deyil. Təbii ki, keyfiyyət fərqi, rəqibin səviyyəsi yüksəkdir. Amma biz düşünürük ki, yaxın gələcəkdə oyunçularımız inkişaf edərək daha yaxşı nəticələr qazanacaqlar".
Qeyd edək ki, yığmamız seçmə mərhələdə keçirdiyi 4 matçın hamısında uduzub.
Banuçiçək Hüseynli
İdman.biz
