İdman.biz
"Qarşılaşma istədiyimiz kimi keçmədi".
Bunu İdman.bizə "Sabah"ın basketbolçusu Endər Poladxanlı deyib.
O, FIBA Çempionlar Liqasının təsnifat mərhələsində İsveçin "Norçepinq Dolfins" klubuna 71:75 hesabla məğlub olduqları oyunu şərh edib.
Poladxanlının sözlərinə görə, onların məqsədi əsas mərhələyə vəsiqə qazanmaq olub: "Təbii ki, biz bu matça qələbə üçün çıxmışdıq. Lakin alınmadı. İdmanda hər şey olur. Mənə elə gəlir ki, çox yaxşı mübarizə apardıq. Maraqlı oyun keçdi. Son saniyəyə kimi bilinmirdi qalib kim olacaq. Bu dəfə onlar qazandı. Amma biz öz zəif nöqtələrimizi gördük. Onların üzərində işləməyə çalışacağıq. Məğlubiyyətimizə əsas səbəb formamızda deyildi. Komanda olaraq atışlarımız yaxşı alındı, istədiyimiz kombinasiyalar edə bildik. Rəqib bizi çox yaxşı təhlil etmişdi və çox vaxt istəyimizin qabağını alırdı. Ona görə bu cür oldu. Rəqib, sözün əsl mənasında yaxşı komanda idi. Bu mərhələyə də yaxşı hazırlaşmışdılar. Artıq uzun illərdir ki, bu komanda eyni heyətlə çıxış edir. Bunun özü də vacib şərtdir. Çünki komanda da bir-birini anlamaq önəmlidir. Biz isə təzə komandayıq. Təzə transferlərimiz var. İnanıram ki, gələn il Çempionlar Liqasının təsnifat mərhələsinə vəsiqə qazansaq, tam fərqli olacaq".
O bildirib ki, bu il FIBA Avropa Kubokunda mübarizə aparacaqlar: "Təbii ki, əsas məqsədimiz Avropa Kubokunda ən azından qrupdan çıxmağa çalışacağıq. Komandamız bu potensiala malikdir. İnanıram ki, bunu bacaracağıq".
Qeyd edək ki, Avropa Kubokunun G qrupunda mübarizə aparacaq "Sabah" ilk matçına oktyabrın 10-da çıxacaq.
Banuçiçək Hüseynli
İdman.biz
