Dina Ulyanova: "Qürur duyulmağımızı arzulayıram" - MÜSAHİBƏ

Azərbaycan millisinin basketbolçusu Dina Ulyanovanın İdman.bizə müsahibəsi

- Bu gün basketbolun 3x3 növü üzrə Dünya kubokunun Bakıda keçirilən seçmə mərhələsi start götürür. İlk dəfə ölkəmizdə baş tutacaq seçmə oyunlarına hazırlıq neçə keçdi? Komandamız belə məsul turnirə nə dərəcədə hazırdır?

- Hazırlıq dövrünün yarısını Bakıda keçirdik. Basketbol və trenajor zallarında intensiv məşqlər etdik, əlavə fərdi hazırlıq da gerçəkləşdirdik. Sonra matçların keçirildiyi "Sea Breeze"ə gəldik ki, uyğunlaşacaq və 3x3 meydançasında məşq edə. Hazırda komandamız əla formadadır və yaxşı nəticələr göstərməyə hazırdır.

- Millimiz B qrupunda Misir və Latviya ilə qarşılaşacaq. Rəqibləri necə qiymətləndirirsiz?

- Rəqibi qiymətləndirməmək olmaz. Turnirə sifariş olunan bütün komandalar layiqli mübarizə aparmalıdırlar. Əminəm ki, maraqlı oyunlar olacaq.

- Millimiz bu vacib turnirə evdə keçirəcək. Sizcə, doğma azarkeşlərin dəstəyi üstünlükdür, yoxsa əlavə məsuliyyət?

- Şəxsən mənim üçün əlbəttə ki, əlavə məsuliyyətdir. Amma eyni zamanda bizim dəyərli azarkeşlərin dəstəyidir. Gözəl oyun göstərmək istərdim ki, bizimlə fəxr etsinlər.

- Ötən il Paris-2024 Yay Olimpiya Oyunlarına qatılan və azarkeşlərin yaxşı tanıdığı heyətdə dəyişikliklər olub. Millinin yeni oyunçuları Brianna Frezer və Arika Karterin gəlişini necə dəyərləndirirsiz? İndiki heyət əvvəlkindən nə ilə fərqlənir?

- Bu heyətlə iki il əvvəl "Neftçi"nin heyətində müvəffəqiyyətlə çıxış etmişik. Yenidən bir araya gəlməyimizə çox sevindik. Qızlar yüksək səviyyəli komandalarda gözəl mövsümlər keçiriblər, daha təcrübəli oyunçular olublar. Bu da bizim üçün çox vacibdir. Ən əsası isə hamı vəsiqə uğrunda mübarizəyə köklənib.

- Millimizin hədəfinin Dünya kubokuna vəsiqə qazanmaq olduğu bəllidir. Bəs əsas rəqiblər kimi hansı komandaları görürsüz? Məqsədə çatmaq üçün yığmamıza nə lazımdır?

- Düşünürəm ki, əsas rəqib elə biz özümüzük. Motivasiya, düzgün köklənmək, bir-birimizə dəstək və azarkeşlərin dəstəyi önəmlidir. Ən vacibi öz emosiyalarımızın öhdəsindən gəlmək və hədəfə doğru təmkinlə irəliləməkdir.

- Seçmə mərhələdən dərhal sonra Qadın seriyasının Bakı mərhələsi baş tutacaq. Ardıcıl dörd gün oynamaq çətin olmayacaq? Bu turnir üçün məqsəd və planlar nədən ibarətdir?

- Ola bilsin ki, ardıcıl iki turnir fiziki baxımdan ağır olsun. Amma bizim üçün mövsüm indi başlayır. Buna görə də gücümüz və enerjimiz tamdır. Çalışacağıq ki, tam gücümüzü qoyaq və oyunlar arası fasilədə yaxşı istirahət edək. Biz hər turnirdə qələbə iddiasında, qalib gəlmək istəyindəyik. Bu yarış da istisna deyil.

Vüqar Xeyrullayev
İdman.biz