İdman.biz
"Qarşılaşmalar çox ağır və çətin keçdi".
İdman.biz xəbər verir ki, bunu basketbolun 3x3 növü üzrə Azərbaycan yığmasının üzvü Dina Ulyanova deyib.
O, Qadın seriyasının Bakı mərhələsində keçirdikləri görüşləri şərh edib. Ulyanova bildirib ki, hər iki görüşə qələbə üçün çıxsalar da, alınmayıb: "Olimpiadadan sonra bu yarışa hazırlaşmaq həm fiziki, həm də psixoloji baxımdan çətin idi. Lakin bütün bunlara rəğmən özümüzü toparlayıb, davamlı şəkildə məşqlər edirdik".
Onun sözlərinə görə, gələcəyə inamla baxırlar: "İnanırıq ki, Avropa kubokuna yaxşı şəkildə hazırlaşıb, yüksək nəticə əldə edəcəyik. Təbii ki, az vaxt qalıb. Birinci növbədə əsas məsələ qrupdan çıxmaqdır. Hər turnir ərəfəsində özümüzü qələbə kökləyirik. Kubokda da medal uğrunda mübarizə aparacağıq".
Qeyd edək ki, millimiz Düsseldorf ZOOS"a (Almaniya) 8:21, Ukrayna yığmasına isə (12:16) hesabı ilə məğlub olaraq, Bakı mərhələsi ilə vidalaşıblar.
Banuçiçək Hüseynli
İdman.biz
