Idman.biz
Azərbaycanın qadınlardan ibarət basketbolun 3x3 növü üzrə millisi sentyabrın ilk yarısını uğurla başa vurub. Komandamız Kopenhagendə Avropa çempionatının gümüş medalını qazandıqdan sonra, Şanxayda keçirilən Dünya Seriyasının final turnirində də 2-ci yeri əldə edib. İdman.biz yığmamızın ən məhsuldar basketbolçusu Briana Freyzer ilə müsahibəni təqdim edir:
– Milli komanda Dünya Seriyasının finalında debüt etdi və gümüş medal qazandı. Avropa çempionatındakı uğurdan sonra bu turnirdə motivasiya necə idi?
– İki il əvvəl Dünya Seriyasının həlledici mərhələsində oynamışdıq. Həmin vaxt indiki heyətimiz – Erika Karter, Aleksandra Mollenhauer, Dina Ulyanova və mən – "Neftçi" klubunu Ulan-Batorda təmsil edirdik. 1/4 finala qədər irəliləyə bildik. İndi isə milli komanda olaraq mövsümün finalına yüksəldik və gümüş medal qazandıq. Bu nailiyyətə görə çox sevinirəm. Komanda yaxşı hazırlaşmışdı və göstərdi ki, biz artıq yalnız Avropada yox, dünyada da liderlərdən biriyik.
– Şanxayda çox gərgin mübarizə oldu, üç oyunu – 1/4 final və yarımfinal da daxil olmaqla, iki xal fərqi ilə qazandınız. Demək olarmı ki, mənəvi-psixoloji keyfiyyətlər finala çıxmağınızda əsas rol oynadı?
– Biz oyundan-oyuna addımlayırdıq və təbii ki, hər görüşdə qələbə qazanmaq istəyirdik. Kanadaya startdakı məğlubiyyətdən sonra Niderland U-25 üzərində qələbə qazandıq və qrupun son oyununa – Rumıniyanın "Rapid"inə qarşı görüşə hazırlaşırdıq. Amma güclü yağış səbəbindən oyun təxirə salındı və yalnız ertəsi gün oynadıq. Bu, motivasiyamıza təsir etmədi və qələbə bizi pley-off-a daşıdı. Burada artıq gərgin anlar başladı. Lakin 1/4 finalda Monqolustanın "Ulan-Bator Amazons" komandası ilə, sonra isə yarımfinalda Niderlandla qarşılaşmada taktiki cəhətdən düzgün oynadıq, məşqçinin tapşırıqlarını yerinə yetirdik və finala yüksəldik.
– Avropa çempionatının finalındakı məğlubiyyətə görə Niderland basketbolçularından revanş almaq xoş oldu?
– Kopenhagendə onlara qarşı yaxşı oynamışdıq, sadəcə beş xal fərqi ilə uduzmuşduq. Onların oyun sxemini təxminən bilirdik. Şanxayda qrup birincisi olaraq birbaşa yarımfinala çıxmışdılar. Matçımız çox gərgin keçdi, son saniyələrə qədər mübarizə getdi və nəticədə qələbə bizim oldu.
– Turnirə Kanadaya qarşı oyunla başladınız, finalda da onlarla qarşılaşdınız və hər iki dəfə rəqib qələbə qazandı. Həlledici matçın alınmamasına görə təəssüfləndinizmi?
– Kimlə oynamağımızdan asılı olmayaraq, mən həmişə milli komandamızın gücünə inanıram. Əlbəttə, hamımız qalib gəlmək istəyirdik, amma bu oyunlar bizə hansı cəhətləri daha da inkişaf etdirməli olduğumuzu göstərdi. Kanada üçüncü dəfə Dünya Liqasının qalibi oldu. Finalda uzaq məsafədən dəqiq atışlarla tez fərqləndilər və irəlilədilər. Bir anda fərqi azaltmağa nail olduq, amma həlledici məqamda üstünlüyü kanadalılar qazandı. Finala yüksəlmək özü-özlüyündə bizim üçün böyük uğurdur. Göstərdiyimiz oyun isə gələcək üçün ilham verir.
– Siz Dünya Seriyasının final mərhələsinin ən yaxşı snayperi oldunuz, 54 xal qazandınız və 31 ribaundla da liderlik etdiniz. Demək olarmı ki, yalnız milli komanda yox, sizin oyun səviyyəniz də yeni mərhələyə yüksəldi?
– Basketbolda ilk növbədə komanda nailiyyətləri vacibdir. Milli komandanın belə uğurlar qazanması qürurvericidir – Dünya Liqasının, Avropa çempionatının finalında oynadıq, ondan əvvəl Buxarest və Sumqayıt mərhələlərində qələbə qazandıq. Komandaya öz töhfəmi verdiyimə görə sevinirəm, amma yoldaşlarım da az zəhmət çəkmədilər. Statistikada lider olmaq xoşdur, lakin kollektiv uğur daha dəyərlidir.
Zaki Feyzullayev
İdman.biz
