Report.az
Azərbaycanın oğlan basketbolçulardan ibarət U-18 millisi Türkiyədə təlim-məşq toplanışı keçəcək.
Bu barədə "Report"a yığmanın baş məşqçisi Anar Sarıyev məlumat verib.
Mütəxəssis Avropa çempionatının B divizionunun oyunlarına ciddi hazırlaşdıqlarını bildirib:
"Avropa çempionatının startına hələ vaxt var. Məşqləri bir ay Bakıda davam etdirəcəyik. İyulun 12-də təlim-məşq toplanışı keçmək üçün Türkiyəyə yola düşəcəyik. Yığma orada bir neçə yoxlama matçında qüvvəsini sınayacaq. Daha sonra Avropa çempionatında iştirak etmək üçün Rumıniyaya yollanacağıq".
A.Sarıyev Gürcüstanın paytaxtı Tbilisidə keçirilən təlim-məşq toplanışının ilk mərhələsində güc topladıqlarını söyləyib:
"Gürcüstandakı hazırlıq pis keçmədi. Üstünlüyü yoxlama oyunlarına verdik. Çoxlu matçlar keçirmək istəyirdik ki, məşqlərdə qazandığımız təcrübəni görüşlərdə sərgiləyək. Heyətdə yer alan basketbolçuların əksəriyyəti ölkə çempionatında yetərincə forma şansı əldə etməyiblər. Ona görə istədim ki, hər biri meydançaya çıxsın və oyun təcrübəsi qazansın".
Qeyd edək ki, milli iyulun 25-dən avqustun 3-dək Rumıniyanın Piteşti şəhərində keçiriləcək Avropa çempionatının B divizionunda mübarizə aparacaq. Yığma qitə birinciliyinin B qrupunda meydan sahibi komanda, Gürcüstan, Danimarka, Ukrayna və Portuqaliya seçmələri ilə qarşılaşacaq
