Azərbaycan U-18 qız basketbol millisinin baş məşqçisi Avropa çempionatı hazırlıqlarından danışıb

Azərbaycanın 18 yaşadək qızlardan ibarət basketbol millisinin baş məşqçisi Evren Alkaya Belarusda keçirilən təlim-məşq toplanışını dəyərləndirib.

Mütəxəssis bu barədə "Report"a açıqlama verib.

O, yoxlama görüşləri barədə danışıb:

"Güclü rəqiblərlə oynadıq. Belarusun U-14 komandasına qarşı keçirdiyimiz hər iki oyun yaxşı oldu. Təbii ki, yaşla əlaqədar fiziki göstəricilərimiz daha yaxşı olduğu üçün qələbə qazana bildik. Belarusun U-18 çempionatında ilk pillələrdə yer alan üç komandaya - "Horizont", "Rquor" və "Viktoriya"ya qarşı oyunlar keçirdik. Çox ciddi və hazır rəqiblər idi. Həm fiziki cəhətdən yaxşı, həm də təcrübəli olduqlarına görə bizə çətinliklər yaşatdılar. "Horizont" və "Viktoriya"ya tam formada olmadığımız üçün uduzduq. Baxmayaraq ki, oyunlar çox templi keçdi. "Rquor"un basketbolçuları fiziki cəhətdən çox güclü idilər. Qiymətli toplanış idi, zəif tərəflərimizi aşkarladıq. U-16-dan dəvət etdiyimiz yeni oyunçular da komandaya uyğunlaşıblar".

Türkiyəli baş məşqçi qarşıdan gələn Avropa çempionatında ilk "3-lük"də qərarlaşmaq istədiklərini vurğulayıb:

"10 gündən sonra Avropa çempionatı ilə bağlı Litvaya yollanacağıq. İyulun 4-də Bosniya və Herseqovina ilə qarşılaşacağıq. Çox ciddi komandadır, 30-40 illik qadın basketbolu mədəniyyətinə malikdirlər. Çox yaxşı komanda formalaşdırıblar. Daha sonra Ukrayna, Litva, Kosova və İslandiya ilə üz-üzə gələcəyik. Ümid edirəm ki, qrupda ilk 3 yerdən birini tutub növbəti mərhələdə oynamaq şansı qazanacağıq. Oyunçularımıza güvənirik, bir-birilərinə uyğunlaşırlar. Tam formalaşmaları üçün zaman lazımdır. Azərbaycan U-18 millisi tarixdə ilk dəfə belə yarışda iştirak edəcək. Ümidvaram ki qələbələr qazanacağıq".

Qeyd edək ki, yığma Belarusdakı təlim-məşq toplanışında 6 yoxlama oyunu keçirib. Komanda yerli "Rquor" (84:39), "Rquor 2" (80:30) komandalarına qalib gəlib, "Horizont"a (40:68, 53:65) və "Viktoriya"ya (49:53, 62:68) hər iki qarşılaşmada uduzub.

Toplanış iyulun 4-13-ü aralığında Litvanın Alitus və Vilnüs şəhərlərində baş tutacaq Avropa çempionatının B divizionunun oyunlarına hazırlıq məqsədi daşıyıb.