İdman.biz
16 yaşadək basketbolçu qızlardan ibarət Azərbaycan millisi məğlubiyyətsizlik seriyasını davam etdirir.
İdman.biz xəbər verir ki, yığmamız Avropa çempionatlarının C divizionunda heç vaxt uduzmayıb.
Bu yarışın əsası 2000-ci ildə qoyulub. Millimizin U-16-ların C divizionunda debütü isə ötən yay gerçəkləşib.
Andorrada 5 oyunun hamısında qalib gələn Azərbaycan basketbolçuları C divizionunda Avropanın ən yaxşısı olub. Debütdə qazanılan çempion titulunu qorumaq üçün Cəbəllütariqə yollanan yığmamız burada da qələbələri sıralayır.
Millimiz uğurlu seriyasını 7 oyuna çatdırıb. Keçirdiyi bütün matçlarda qalib gələn məğlubedilməzlər bugünkü qalibiyyəti ilə 2 rekord vurub.
Bu gün Gürcüstanı 97:40 hesabı ilə məğlub edən millimiz ilk dəfə belə böyük fərqə nail olub. Komandamızın yığdığı 97 xal da ən yüksək göstəricidir.
Çempion olduğu vaxt müqavimətlə üzləşən basketbolçularımız bu dəfə rəqiblərini asanlıqla məğlub edir. Ermənistanla qarşılaşmada 86 xal yığan və 27 xal fərqi ilə qalib gəlməklə tarixinin rekordlarına imza atan millimiz bir gün sonra hər iki nəticəsini təkrarlayıb. 57 xallıq fərqə sevinən yığma 97 xal əldə edib. Türkiyəli mütəxəssis Evren Alkayanın yetirmələrini 100 xaldan bir üçxallıq atış ayırıb.
AVRO-2023
Qrup mərhələsi
Andorra – 64:50
Moldova – 78:55
Albaniya – 69:64
Yarımfinal
Gürcüstan – 74:72
Final
Andorra – 57:45
AVRO-2024
Qrup mərhələsi
Ermənistan – 86:59
Gürcüstan – 97:40
Vüqar Xeyrullayev
İdman.biz
